I nabofylket i sør hadde ein til og med klart å leggje to slike løp til same dag, med både Storehesten opp i Naustdal og Vetenløpet i Bremanger laurdag 8. juli. Ein flott kontingent frå vårt distrikt hadde teke turen til vakre Bremanger, men i år var ein ikkje heldig med forholda. Det regna og var surt, og mot toppen var det slik at det var godt at avstanden mellom stikkene ikkje var større enn den var skulle ein finne fram.

I konkurranseklassa finn vi to deltakarar frå Åheim. I kvinner 50-59 år var Liv Berge med tida 49,20 i år tre sekund raskare enn i fjor og godt nøgd med det. Gunnar Borg plagdest litt med ryggen og var ikkje heilt fornøgd med tida 54,33 som ga 7. plass i klasse 60-69 år. Likevel ei fin tid som mange skulle fått brynt seg på. Vi ser også at Jostein Visnes frå Almenning sprang eit minutt raskare enn i fjor og fekk tida 44,32. Merete Helgheim frå Måløy, som også var med i 1.mailøpet, vann dameklassa totalt med flotte 35,18, og vi ser at Jan Erik Sørhaug frå Bryggja er attende i form og brukte 35,08 i klasse 23-29 år.

I mosjonsklassa utan tidtaking er det ikkje lagt ut lister enno, men vi veit at Idar Berget tok turen til topps samman med blant andre Hanne Linn Berge, Kirsten og Tormod Hvattum, Svein Bøstrand, Marit Margrete Berget, Svein Thue og Åshild D. Thue.