To nyskapingar av året var Vetenløpet i Bremanger og Eggenipa opp i Breim. Utanom at det nydelege veret og den flotte opplevinga var felles, var det to heilt ulike løp. Vetenløpet samla 379 deltakarar, 75 av dei i konkurranseklassa. Trekkplasteret Odd-Bjørn Hjelmeset var også raskast opp og brukte 28,49 minutt. Best frå våre kantar gjorde Jostein visnes frå Almenning det, med tida 45,30 minutt og andreplass i klasse 60-69 år. Sonen Inge vart nummer tre i klasse 23-39 år med tida 38,02. Også Ole Magne Kvalsvik, Liv og Helge Berge gjekk på tid, medan Idar Berget denne gongen valde trimklassa. Dette er ein familievennleg tur frå Grotlesanden og opp til Veten, 527 meter over havet. Vi anbefalar alle å setje av 8. juli neste år.
Eggenipa er den markerte toppen ein ser når ein køyrer gjennom Våtedalen i Breim. Løpet gjekk 31. juli og starta ved den kjende siloen til Ola Egge der nipa er mala så fint inn i siloveggen. Første delen gjekk mykje i tung myr og "bukkemark," før det på slutten barst nesten over i klatring, til dels med tau i brattaste partia. Imponerande av vinnaren, unge Arve Rindal frå Eid, som brukte 52,05 minutt til toppen på 1339 meter og slo klart meir kjende Roger Aa Djupvik. Ole Magne gjekk på tid også her og brukte 1 time 26,59 minutt, medan Gunnar og Liv Ingrid Borg gjekk i trimklassa. Etterpå kunne ein halde fram i slakare terreng sørover til Heggheimstøylen og ein fin rundtur ut att den idylliske dalen.
Det er no klart for dei meir etablerte løpa, som Saudehornet Opp, Skåla Opp og Fanaråken opp, så her er det berre å hive seg rundt og verte med.